ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានថ្លែងភ្ជាប់ពីការអភិវឌ្ឍន៍ទាញទៅនឹងប្រវត្តិនៃការឈឺចាប់របស់ប្រទេសកម្ពុជា។ សម្ដេចថាសង្គ្រាម ៥០០ឆ្នាំនៃកម្ពុជាត្រូវបានបញ្ចប់មែន ប៉ុន្តែស្លាកស្នាមនៅតែមានទឹកដីរបស់កម្ពុជានៅឡើយ។
ថ្លែងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការស្ថានីយប្រព្រឹត្តកម្មទឹកកខ្វក់ជើងឯក ព្រឹកថ្ងៃពុធ ទី២៧ ខែធ្នូ ឆ្នាំ២០២៣នេះ សម្ដេចធិបតី បានថ្លែងថាកន្លែងដែលកំពុងឈរនេះកាលពីជាង ៤០ឆ្នាំមុន គឺជាកន្លែងកប់ខ្មោចដ៏ធំក្រោមរបបខ្មែរក្រហម។ សម្ដេចថាប្រវត្តិសាស្ត្រនៃការឈឺចាប់វានៅតែដិតតាមនៅកម្ពុជា ហើយត្រូវតែចងចាំថានឹងមិនត្រូវឲ្យមានរឿងបែបនេះកើតឡើងម្ដងទៀតនោះទេ។
សម្ដេចបានលើកឡើងថា ការបាត់បង់ពលរដ្ឋខ្មែរជាច្រើនលាននាក់នៅក្នុងរបបខ្មែរក្រហមវាកើតឡើងចេញពីរដ្ឋប្រហារឆ្នាំ១៩៧០ ដែលធ្វើឲ្យខ្មែរក្រហមកាន់តែមានឥទ្ធិពលនិងទទួលជោគជ័យជម្នះនៅឆ្នាំ១៩៧៥។
សម្ដេចបានរំលឹកថា ការអភិវឌ្ឍដែលទទួលបានក្នុងពេលបច្ចុប្បន្ននេះគឺដោយសារតែសន្តិភាពដែលបានខិតខំថែរក្សាតាំងពីឆ្នាំ១៩៩៨ រហូតដល់បច្ចុប្បន្ន ដូច្នេះត្រូវការពារសុខសន្តិភាពឱ្យបាន៕
